Detras de kada estadistika de muerte o eshpitalizasion de Covid, ay munchas personas komo yo, ke son parientes, amigos, haveres o vizinos de alguno ke se topa eshpitalizado kon Covid. Akeyos que no pudieron estar al lado de su ser kerido pueden bivir kon dolor i repentimiento por el resto de sus vidas.
Mi padre fue eshpitalizado kon Covid-19. Pudimos fazer videoyamadas ma no pudimos vijitarlo en persona. Mi padre tiene problemas de odision i kon el inglez. Antes de la pandemia, cuando mi padre estavna en el eshpitall, alguno de la famiya siempre estava a su lado para ke entendiera luke le estava afitando i no se sintiera solo. Durmi munchas vezes en siyas inkomodas en eSHpitales. Ma esta vez, dinguno de la famiya pudo estar ayi para konsolarlo. Tenia miedo de ke mi padre muriera sin ke pudieramos tomar su mano o abrasarlo para ke supiera ke sus seres keridos estavan serka de el. Afilú kuando la djente puede realizar vijitas kon los ke se estan muriendo, no todos los miembros de la famiya pueden riZikar a fazer la vijita porke no pueden permitir infektarsen kon Covid en el eshpital.
Uno tiene mazal si el eshpital tiene una buena koneksion o atadijo al internet i el ekipo sanitario tiene tiempo para fazer una videoyamada. A vezes, las enfermieras o los doktores tienen menester de uzar uno de sus telefonos personales para fazer videoyamadas.
Algunos hazinos mueren solos sin dingun kontakto kon sus seres keridos. Eyos se topan arodeados de makinas i personas que no pueden rekonoser por mor de ke todo el ekipo mediko kulanea dos tapamushos i un protektor de facha i pueden vistirsen kon tanto ekipamiento de proteksion ke paresen a astronautas.
Esta hazinura de Covid no es una shaká. Es real. Es kruel. Les está arovando a las personas sus dignitá al morir.
Esto partajando mi istoria para ke vozotros veygásh komo no uzar tapamushos, pratikar distansiamiento sosial i pratikar buena ijiene faze ke el virus se propage i mas personas esten eshpitalizadas i mueran de una manera kruela i solitaria.
Imajinádvos si estuvierash vozotros en la kama del eSHpital. Estash kompletamente solos. No tenesh a dinguno kon ken favlar. Puede ser ke no entendash luke esta afitando. Imajinádvos si la persona que muere de Covid fuera uno de vuestros parientes serkanos, amigos o seres keridos.
Orozamente, mi padre pudo salir del eshpital, ma esto no es el kavzo para munchas personas. Las sifras de mortalidad sigen pujando i el virus esta mutando.
Vos rogo de ser amavle kon los empiegados medikos. Eyos estan metiendo sus vidas en perikolo i algunos estan muriendo ugrasheando de salvar la vida de sus seres keridos. En mi kavzo, yevi komida a los empiegados del eshpital en sinyo de rengrasiamiento.
Vos rogo de tomar esta pandemia en serio. Vos aseguro ke no keresh bivir kon el miedo de deshar ke vuestros seres keridos mueran solos.
